<< Judges 10 HEB >>


Tola judges Israel in Shamir
1   וַיָּקָם֩  אַחֲרֵ֨י  אֲבִימֶ֜לֶךְ  לְהֹושִׁ֣יעַ  אֶת־  יִשְׂרָאֵ֗ל  תֹּולָ֧ע  בֶּן־  פּוּאָ֛ה  בֶּן־  דֹּודֹ֖ו  אִ֣ישׁ  יִשָּׂשכָ֑ר  וְהֽוּא־  יֹשֵׁ֥ב  בְּשָׁמִ֖יר  בְּהַ֥ר  אֶפְרָֽיִם׃  2   וַיִּשְׁפֹּט֙  אֶת־  יִשְׂרָאֵ֔ל  עֶשְׂרִ֥ים  וְשָׁלֹ֖שׁ  שָׁנָ֑ה  וַיָּ֖מָת  וַיִּקָּבֵ֥ר  בְּשָׁמִֽיר׃  פ 


Jair, whose thirty sons had thirty cities
3   וַיָּ֣קָם  אַחֲרָ֔יו  יָאִ֖יר  הַגִּלְעָדִ֑י  וַיִּשְׁפֹּט֙  אֶת־  יִשְׂרָאֵ֔ל  עֶשְׂרִ֥ים  וּשְׁתַּ֖יִם  שָׁנָֽה׃  4   וַֽיְהִי־  לֹ֞ו  שְׁלֹשִׁ֣ים  בָּנִ֗ים  רֹֽכְבִים֙  עַל־  שְׁלֹשִׁ֣ים  עֲיָרִ֔ים  וּשְׁלֹשִׁ֥ים  עֲיָרִ֖ים  לָהֶ֑ם  לָהֶ֞ם  יִקְרְא֣וּ  חַוֹּ֣ת  יָאִ֗יר  עַ֚ד  הַיֹּ֣ום  הַזֶּ֔ה  אֲשֶׁ֖ר  בְּאֶ֥רֶץ  הַגִּלְעָֽד׃  5   וַיָּ֣מָת  יָאִ֔יר  וַיִּקָּבֵ֖ר  בְּקָמֹֽון׃  פ 


The Philistines and Ammonites oppress Israel
6   וַיֹּסִ֣פוּ  בְּנֵ֣י  יִשְׂרָאֵ֗ל  לַעֲשֹׂ֣ות  הָרַע֮  בְּעֵינֵ֣י  יְהוָה֒  וַיַּעַבְד֣וּ  אֶת־  הַבְּעָלִ֣ים  וְאֶת־  הָעַשְׁתָּרֹ֡ות  וְאֶת־  אֱלֹהֵ֣י  אֲרָם֩  וְאֶת־  אֱלֹהֵ֨י  צִידֹ֜ון  וְאֵ֣ת  אֱלֹהֵ֣י  מֹואָ֗ב  וְאֵת֙  אֱלֹהֵ֣י  בְנֵי־  עַמֹּ֔ון  וְאֵ֖ת  אֱלֹהֵ֣י  פְלִשְׁתִּ֑ים  וַיַּעַזְב֥וּ  אֶת־  יְהוָ֖ה  וְלֹ֥א  עֲבָדֽוּהוּ׃  7   וַיִּֽחַר־  אַ֥ף  יְהוָ֖ה  בְּיִשְׂרָאֵ֑ל  וַֽיִּמְכְּרֵם֙  בְּיַד־  פְּלִשְׁתִּ֔ים  וּבְיַ֖ד  בְּנֵ֥י  עַמֹּֽון׃  8   וַֽיִּרְעֲצ֤וּ  וַיְרֹֽצְצוּ֙  אֶת־  בְּנֵ֣י  יִשְׂרָאֵ֔ל  בַּשָּׁנָ֖ה  הַהִ֑יא  שְׁמֹנֶ֨ה  עֶשְׂרֵ֜ה  שָׁנָ֗ה  אֶֽת־  כָּל־  בְּנֵ֤י  יִשְׂרָאֵל֙  אֲשֶׁר֙  בְּעֵ֣בֶר  הַיַּרְדֵּ֔ן  בְּאֶ֥רֶץ  הָאֱמֹרִ֖י  אֲשֶׁ֥ר  בַּגִּלְעָֽד׃  9   וַיַּעַבְר֤וּ  בְנֵֽי־  עַמֹּון֙  אֶת־  הַיַּרְדֵּ֔ן  לְהִלָּחֵ֛ם  גַּם־  בִּיהוּדָ֥ה  וּבְבִנְיָמִ֖ין  וּבְבֵ֣ית  אֶפְרָ֑יִם  וַתֵּ֥צֶר  לְיִשְׂרָאֵ֖ל  מְאֹֽד׃ 


In their misery God sends them to their false gods
10   וַֽיִּזְעֲקוּ֙  בְּנֵ֣י  יִשְׂרָאֵ֔ל  אֶל־  יְהוָ֖ה  לֵאמֹ֑ר  חָטָ֣אנוּ  לָ֔ךְ  וְכִ֤י  עָזַ֙בְנוּ֙  אֶת־  אֱלֹהֵ֔ינוּ  וַֽנַּעֲבֹ֖ד  אֶת־  הַבְּעָלִֽים׃  פ  11   וַ֥יֹּאמֶר  יְהוָ֖ה  אֶל־  בְּנֵ֣י  יִשְׂרָאֵ֑ל  הֲלֹ֤א  מִמִּצְרַ֙יִם֙  וּמִן־  הָ֣אֱמֹרִ֔י  וּמִן־  בְּנֵ֥י  עַמֹּ֖ון  וּמִן־  פְּלִשְׁתִּֽים׃  12   וְצִידֹונִ֤ים  וַֽעֲמָלֵק֙  וּמָעֹ֔ון  לָחֲצ֖וּ  אֶתְכֶ֑ם  וַתִּצְעֲק֣וּ  אֵלַ֔י  וָאֹושִׁ֥יעָה  אֶתְכֶ֖ם  מִיָּדָֽם׃  13   וְאַתֶּם֙  עֲזַבְתֶּ֣ם  אֹותִ֔י  וַתַּעַבְד֖וּ  אֱלֹהִ֣ים  אֲחֵרִ֑ים  לָכֵ֥ן  לֹֽא־  אֹוסִ֖יף  לְהֹושִׁ֥יעַ  אֶתְכֶֽם׃  14   לְכ֗וּ  וְזַֽעֲקוּ֙  אֶל־  הָ֣אֱלֹהִ֔ים  אֲשֶׁ֥ר  בְּחַרְתֶּ֖ם  בָּ֑ם  הֵ֛מָּה  יֹושִׁ֥יעוּ  לָכֶ֖ם  בְּעֵ֥ת  צָרַתְכֶֽם׃ 


Upon their repentance he pities them
15   וַיֹּאמְר֨וּ  בְנֵי־  יִשְׂרָאֵ֤ל  אֶל־  יְהוָה֙  חָטָ֔אנוּ  עֲשֵׂה־  אַתָּ֣ה  לָ֔נוּ  כְּכָל־  הַטֹּ֖וב  בְּעֵינֶ֑יךָ  אַ֛ךְ  הַצִּילֵ֥נוּ  נָ֖א  הַיֹּ֥ום  הַזֶּֽה׃  16   וַיָּסִ֜ירוּ  אֶת־  אֱלֹהֵ֤י  הַנֵּכָר֙  מִקִּרְבָּ֔ם  וַיַּעַבְד֖וּ  אֶת־  יְהוָ֑ה  וַתִּקְצַ֥ר  נַפְשֹׁ֖ו  בַּעֲמַ֥ל  יִשְׂרָאֵֽל׃  פ  17   וַיִּצָּֽעֲקוּ֙  בְּנֵ֣י  עַמֹּ֔ון  וַֽיַּחֲנ֖וּ  בַּגִּלְעָ֑ד  וַיֵּאָֽסְפוּ֙  בְּנֵ֣י  יִשְׂרָאֵ֔ל  וַֽיַּחֲנ֖וּ  בַּמִּצְפָּֽה׃  18   וַיֹּאמְר֨וּ  הָעָ֜ם  שָׂרֵ֤י  גִלְעָד֙  אִ֣ישׁ  אֶל־  רֵעֵ֔הוּ  מִ֣י  הָאִ֔ישׁ  אֲשֶׁ֣ר  יָחֵ֔ל  לְהִלָּחֵ֖ם  בִּבְנֵ֣י  עַמֹּ֑ון  יִֽהְיֶ֣ה  לְרֹ֔אשׁ  לְכֹ֖ל  יֹשְׁבֵ֥י  גִלְעָֽד׃  פ 
<< Judges 10 >>
Biblos Greek and Hebrew Study Bible © 2010 Biblos.com
Online Parallel Bible