<< Jeremiah 15 HEB >>


The utter rejection and manifold judgments of the people.
1   וַיֹּ֤אמֶר  יְהוָה֙  אֵלַ֔י  אִם־  יַעֲמֹ֨ד  מֹשֶׁ֤ה  וּשְׁמוּאֵל֙  לְפָנַ֔י  אֵ֥ין  נַפְשִׁ֖י  אֶל־  הָעָ֣ם  הַזֶּ֑ה  שַׁלַּ֥ח  מֵֽעַל־  פָּנַ֖י  וְיֵצֵֽאוּ׃  2   וְהָיָ֛ה  כִּֽי־  יֹאמְר֥וּ  אֵלֶ֖יךָ  אָ֣נָה  נֵצֵ֑א  וְאָמַרְתָּ֨  אֲלֵיהֶ֜ם  כֹּֽה־  אָמַ֣ר  יְהוָ֗ה  אֲשֶׁ֨ר  לַמָּ֤וֶת  לַמָּ֙וֶת֙  וַאֲשֶׁ֤ר  לַחֶ֙רֶב֙  לַחֶ֔רֶב  וַאֲשֶׁ֤ר  לָֽרָעָב֙  לָֽרָעָ֔ב  וַאֲשֶׁ֥ר  לַשְּׁבִ֖י  לַשֶּֽׁבִי׃  3   וּפָקַדְתִּ֨י  עֲלֵיהֶ֜ם  אַרְבַּ֤ע  מִשְׁפָּחֹות֙  נְאֻם־  יְהוָ֔ה  אֶת־  הַחֶ֣רֶב  לַֽהֲרֹ֔ג  וְאֶת־  הַכְּלָבִ֖ים  לִסְחֹ֑ב  וְאֶת־  עֹ֧וף  הַשָּׁמַ֛יִם  וְאֶת־  בֶּהֱמַ֥ת  הָאָ֖רֶץ  לֶאֱכֹ֥ל  וּלְהַשְׁחִֽית׃  4   וּנְתַתִּ֣ים  [לִזְוָעָה  כ]  (לְזַֽעֲוָ֔ה  ק)  לְכֹ֖ל  מַמְלְכֹ֣ות  הָאָ֑רֶץ  בִּ֠גְלַל  מְנַשֶּׁ֤ה  בֶן־  יְחִזְקִיָּ֙הוּ֙  מֶ֣לֶךְ  יְהוּדָ֔ה  עַ֥ל  אֲשֶׁר־  עָשָׂ֖ה  בִּירוּשָׁלִָֽם׃  5   כִּ֠י  מִֽי־  יַחְמֹ֤ל  עָלַ֙יִךְ֙  יְר֣וּשָׁלִַ֔ם  וּמִ֖י  יָנ֣וּד  לָ֑ךְ  וּמִ֣י  יָס֔וּר  לִשְׁאֹ֥ל  לְשָׁלֹ֖ם  לָֽךְ׃  6   אַ֣תְּ  נָטַ֥שְׁתְּ  אֹתִ֛י  נְאֻם־  יְהוָ֖ה  אָחֹ֣ור  תֵּלֵ֑כִי  וָאַ֨ט  אֶת־  יָדִ֤י  עָלַ֙יִךְ֙  וָֽאַשְׁחִיתֵ֔ךְ  נִלְאֵ֖יתִי  הִנָּחֵֽם׃  7   וָאֶזְרֵ֥ם  בְּמִזְרֶ֖ה  בְּשַׁעֲרֵ֣י  הָאָ֑רֶץ  שִׁכַּ֤לְתִּי  אִבַּ֙דְתִּי֙  אֶת־  עַמִּ֔י  מִדַּרְכֵיהֶ֖ם  לֹוא־  שָֽׁבוּ׃  8   עָֽצְמוּ־  לִ֤י  אַלְמְנֹתָו֙  מֵחֹ֣ול  יַמִּ֔ים  הֵבֵ֨אתִי  לָהֶ֥ם  עַל־  אֵ֛ם  בָּח֖וּר  שֹׁדֵ֣ד  בַּֽצָּהֳרָ֑יִם  הִפַּ֤לְתִּי  עָלֶ֙יהָ֙  פִּתְאֹ֔ם  עִ֖יר  וּבֶהָלֹֽות׃  9   אֻמְלְלָ֞ה  יֹלֶ֣דֶת  הַשִּׁבְעָ֗ה  נָפְחָ֥ה  נַפְשָׁ֛הּ  [בָּאָה  כ]  (בָּ֥א  ק)  שִׁמְשָׁ֛הּ  בְּעֹ֥ד  יֹומָ֖ם  בֹּ֣ושָׁה  וְחָפֵ֑רָה  וּשְׁאֵֽרִיתָ֗ם  לַחֶ֧רֶב  אֶתֵּ֛ן  לִפְנֵ֥י  אֹיְבֵיהֶ֖ם  נְאֻם־  יְהוָֽה׃  ס 


Jeremiah, complaining of their spite, receives a promise for himself;
10   אֹֽוי־  לִ֣י  אִמִּ֔י  כִּ֣י  יְלִדְתִּ֗נִי  אִ֥ישׁ  רִ֛יב  וְאִ֥ישׁ  מָדֹ֖ון  לְכָל־  הָאָ֑רֶץ  לֹֽא־  נָשִׁ֥יתִי  וְלֹא־  נָֽשׁוּ־  בִ֖י  כֻּלֹּ֥ה  מְקַלְלַֽונִי׃  ס  11   אָמַ֣ר  יְהוָ֔ה  אִם־  לֹ֥א  [שָׁרֹותִךָ  כ]  (שֵֽׁרִיתִ֖יךָ  ק)  לְטֹ֑וב  אִם־  לֹ֣וא  הִפְגַּ֣עְתִּֽי  בְךָ֗  בְּעֵ֥ת־  רָעָ֛ה  וּבְעֵ֥ת  צָרָ֖ה  אֶת־  הָאֹיֵֽב׃ 


and a threatening for them.
12   הֲיָרֹ֨עַ  בַּרְזֶ֧ל  בַּרְזֶ֛ל  מִצָּפֹ֖ון  וּנְחֹֽשֶׁת׃  13   חֵילְךָ֧  וְאֹוצְרֹותֶ֛יךָ  לָבַ֥ז  אֶתֵּ֖ן  לֹ֣א  בִמְחִ֑יר  וּבְכָל־  חַטֹּאותֶ֖יךָ  וּבְכָל־  גְּבוּלֶֽיךָ׃  14   וְהַֽעֲבַרְתִּי֙  אֶת־  אֹ֣יְבֶ֔יךָ  בְּאֶ֖רֶץ  לֹ֣א  יָדָ֑עְתָּ  כִּֽי־  אֵ֛שׁ  קָדְחָ֥ה  בְאַפִּ֖י  עֲלֵיכֶ֥ם  תּוּקָֽד׃  ס 


He prays;
15   אַתָּ֧ה  יָדַ֣עְתָּ  יְהוָ֗ה  זָכְרֵ֤נִי  וּפָקְדֵ֙נִי֙  וְהִנָּ֤קֶם  לִי֙  מֵרֹ֣דְפַ֔י  אַל־  לְאֶ֥רֶךְ  אַפְּךָ֖  תִּקָּחֵ֑נִי  דַּ֕ע  שְׂאֵתִ֥י  עָלֶ֖יךָ  חֶרְפָּֽה׃  16   נִמְצְא֤וּ  דְבָרֶ֙יךָ֙  וָאֹ֣כְלֵ֔ם  וַיְהִ֤י  [דְבָרֶיךָ  כ]  (דְבָֽרְךָ֙  ק)  לִ֔י  לְשָׂשֹׂ֖ון  וּלְשִׂמְחַ֣ת  לְבָבִ֑י  כִּֽי־  נִקְרָ֤א  שִׁמְךָ֙  עָלַ֔י  יְהוָ֖ה  אֱלֹהֵ֥י  צְבָאֹֽות׃  ס  17   לֹֽא־  יָשַׁ֥בְתִּי  בְסֹוד־  מְשַׂחֲקִ֖ים  וָֽאֶעְלֹ֑ז  מִפְּנֵ֤י  יָֽדְךָ֙  בָּדָ֣ד  יָשַׁ֔בְתִּי  כִּֽי־  זַ֖עַם  מִלֵּאתָֽנִי׃  ס  18   לָ֣מָּה  הָיָ֤ה  כְאֵבִי֙  נֶ֔צַח  וּמַכָּתִ֖י  אֲנוּשָׁ֑ה֙  מֵֽאֲנָה֙  הֵֽרָפֵ֔א  הָיֹ֨ו  תִֽהְיֶ֥ה  לִי֙  כְּמֹ֣ו  אַכְזָ֔ב  מַ֖יִם  לֹ֥א  נֶאֱמָֽנוּ׃  ס 


and receives a gracious promise.
19   לָכֵ֞ן  כֹּֽה־  אָמַ֣ר  יְהוָ֗ה  אִם־  תָּשׁ֤וּב  וַאֲשִֽׁיבְךָ֙  לְפָנַ֣י  תַּֽעֲמֹ֔ד  וְאִם־  תֹּוצִ֥יא  יָקָ֛ר  מִזֹּולֵ֖ל  כְּפִ֣י  תִֽהְיֶ֑ה  יָשֻׁ֤בוּ  הֵ֙מָּה֙  אֵלֶ֔יךָ  וְאַתָּ֖ה  לֹֽא־  תָשׁ֥וּב  אֲלֵיהֶֽם׃  20   וּנְתַתִּ֜יךָ  לָעָ֣ם  הַזֶּ֗ה  לְחֹומַ֤ת  נְחֹ֙שֶׁת֙  בְּצוּרָ֔ה  וְנִלְחֲמ֥וּ  אֵלֶ֖יךָ  וְלֹא־  י֣וּכְלוּ  לָ֑ךְ  כִּֽי־  אִתְּךָ֥  אֲנִ֛י  לְהֹושִֽׁיעֲךָ֥  וּלְהַצִּילֶ֖ךָ  נְאֻם־  יְהוָֽה׃  21   וְהִצַּלְתִּ֖יךָ  מִיַּ֣ד  רָעִ֑ים  וּפְדִתִ֖יךָ  מִכַּ֥ף  עָרִצִֽים׃  פ 
<< Jeremiah 15 >>
Biblos Greek and Hebrew Study Bible © 2010 Biblos.com
Online Parallel Bible