<< Isaiah 35 HEB >>


The joyful flourishing of Christ's kingdom
1   יְשֻׂשׂ֥וּם  מִדְבָּ֖ר  וְצִיָּ֑ה  וְתָגֵ֧ל  עֲרָבָ֛ה  וְתִפְרַ֖ח  כַּחֲבַצָּֽלֶת׃  2   פָּרֹ֨חַ  תִּפְרַ֜ח  וְתָגֵ֗ל  אַ֚ף  גִּילַ֣ת  וְרַנֵּ֔ן  כְּבֹ֤וד  הַלְּבָנֹון֙  נִתַּן־  לָ֔הּ  הֲדַ֥ר  הַכַּרְמֶ֖ל  וְהַשָּׁרֹ֑ון  הֵ֛מָּה  יִרְא֥וּ  כְבֹוד־  יְהוָ֖ה  הֲדַ֥ר  אֱלֹהֵֽינוּ׃  ס 


The weak are encouraged by the virtues and privileges of the Gospel
3   חַזְּק֖וּ  יָדַ֣יִם  רָפֹ֑ות  וּבִרְכַּ֥יִם  כֹּשְׁלֹ֖ות  אַמֵּֽצוּ׃  4   אִמְרוּ֙  לְנִמְהֲרֵי־  לֵ֔ב  חִזְק֖וּ  אַל־  תִּירָ֑אוּ  הִנֵּ֤ה  אֱלֹֽהֵיכֶם֙  נָקָ֣ם  יָבֹ֔וא  גְּמ֣וּל  אֱלֹהִ֔ים  ה֥וּא  יָבֹ֖וא  וְיֹשַׁעֲכֶֽם׃  5   אָ֥ז  תִּפָּקַ֖חְנָה  עֵינֵ֣י  עִוְרִ֑ים  וְאָזְנֵ֥י  חֵרְשִׁ֖ים  תִּפָּתַֽחְנָה׃  6   אָ֣ז  יְדַלֵּ֤ג  כָּֽאַיָּל֙  פִּסֵּ֔חַ  וְתָרֹ֖ן  לְשֹׁ֣ון  אִלֵּ֑ם  כִּֽי־  נִבְקְע֤וּ  בַמִּדְבָּר֙  מַ֔יִם  וּנְחָלִ֖ים  בָּעֲרָבָֽה׃  7   וְהָיָ֤ה  הַשָּׁרָב֙  לַאֲגַ֔ם  וְצִמָּאֹ֖ון  לְמַבּ֣וּעֵי  מָ֑יִם  בִּנְוֵ֤ה  תַנִּים֙  רִבְצָ֔הּ  חָצִ֖יר  לְקָנֶ֥ה  וָגֹֽמֶא׃  8   וְהָיָה־  שָׁ֞ם  מַסְל֣וּל  וָדֶ֗רֶךְ  וְדֶ֤רֶךְ  הַקֹּ֙דֶשׁ֙  יִקָּ֣רֵא  לָ֔הּ  לֹֽא־  יַעַבְרֶ֥נּוּ  טָמֵ֖א  וְהוּא־  לָ֑מֹו  הֹלֵ֥ךְ  דֶּ֛רֶךְ  וֶאֱוִילִ֖ים  לֹ֥א  יִתְעֽוּ׃  9   לֹא־  יִהְיֶ֨ה  שָׁ֜ם  אַרְיֵ֗ה  וּפְרִ֤יץ  חַיֹּות֙  בַּֽל־  יַעֲלֶ֔נָּה  לֹ֥א  תִמָּצֵ֖א  שָׁ֑ם  וְהָלְכ֖וּ  גְּאוּלִֽים׃  10   וּפְדוּיֵ֨י  יְהוָ֜ה  יְשֻׁב֗וּן  וּבָ֤אוּ  צִיֹּון֙  בְּרִנָּ֔ה  וְשִׂמְחַ֥ת  עֹולָ֖ם  עַל־  רֹאשָׁ֑ם  שָׂשֹׂ֤ון  וְשִׂמְחָה֙  יַשִּׂ֔יגוּ  וְנָ֖סוּ  יָגֹ֥ון  וַאֲנָחָֽה׃  פ 
<< Isaiah 35 >>
Biblos Greek and Hebrew Study Bible © 2010 Biblos.com
Online Parallel Bible