<< Isaiah 12 HEB >>



A joyful thanksgiving of the faithful for the mercies of God
1   וְאָֽמַרְתָּ֙  בַּיֹּ֣ום  הַה֔וּא  אֹודְךָ֣  יְהוָ֔ה  כִּ֥י  אָנַ֖פְתָּ  בִּ֑י  יָשֹׁ֥ב  אַפְּךָ֖  וּֽתְנַחֲמֵֽנִי׃  2   הִנֵּ֨ה  אֵ֧ל  יְשׁוּעָתִ֛י  אֶבְטַ֖ח  וְלֹ֣א  אֶפְחָ֑ד  כִּֽי־  עָזִּ֤י  וְזִמְרָת֙  יָ֣הּ  יְהוָ֔ה  וַֽיְהִי־  לִ֖י  לִֽישׁוּעָֽה׃  3   וּשְׁאַבְתֶּם־  מַ֖יִם  בְּשָׂשֹׂ֑ון  מִמַּעַיְנֵ֖י  הַיְשׁוּעָֽה׃  4   וַאֲמַרְתֶּ֞ם  בַּיֹּ֣ום  הַה֗וּא  הֹוד֤וּ  לַֽיהוָה֙  קִרְא֣וּ  בִשְׁמֹ֔ו  הֹודִ֥יעוּ  בָֽעַמִּ֖ים  עֲלִֽילֹתָ֑יו  הַזְכִּ֕ירוּ  כִּ֥י  נִשְׂגָּ֖ב  שְׁמֹֽו׃  5   זַמְּר֣וּ  יְהוָ֔ה  כִּ֥י  גֵא֖וּת  עָשָׂ֑ה  [מְיֻדַּעַת  כ]  (מוּדַ֥עַת  ק)  זֹ֖את  בְּכָל־  הָאָֽרֶץ׃  6   צַהֲלִ֥י  וָרֹ֖נִּי  יֹושֶׁ֣בֶת  צִיֹּ֑ון  כִּֽי־  גָדֹ֥ול  בְּקִרְבֵּ֖ךְ  קְדֹ֥ושׁ  יִשְׂרָאֵֽל׃  פ 

<< Isaiah 12 >>
Biblos Greek and Hebrew Study Bible © 2010 Biblos.com
Online Parallel Bible