<< Genesis 16 HEB >>



Sarai, being barren, gives Hagar to Abram.
1   וְשָׂרַי֙  אֵ֣שֶׁת  אַבְרָ֔ם  לֹ֥א  יָלְדָ֖ה  לֹ֑ו  וְלָ֛הּ  שִׁפְחָ֥ה  מִצְרִ֖ית  וּשְׁמָ֥הּ  הָגָֽר׃  2   וַתֹּ֨אמֶר  שָׂרַ֜י  אֶל־  אַבְרָ֗ם  הִנֵּה־  נָ֞א  עֲצָרַ֤נִי  יְהוָה֙  מִלֶּ֔דֶת  בֹּא־  נָא֙  אֶל־  שִׁפְחָתִ֔י  אוּלַ֥י  אִבָּנֶ֖ה  מִמֵּ֑נָּה  וַיִּשְׁמַ֥ע  אַבְרָ֖ם  לְקֹ֥ול  שָׂרָֽי׃  3   וַתִּקַּ֞ח  שָׂרַ֣י  אֵֽשֶׁת־  אַבְרָ֗ם  אֶת־  הָגָ֤ר  הַמִּצְרִית֙  שִׁפְחָתָ֔הּ  מִקֵּץ֙  עֶ֣שֶׂר  שָׁנִ֔ים  לְשֶׁ֥בֶת  אַבְרָ֖ם  בְּאֶ֣רֶץ  כְּנָ֑עַן  וַתִּתֵּ֥ן  אֹתָ֛הּ  לְאַבְרָ֥ם  אִישָׁ֖הּ  לֹ֥ו  לְאִשָּֽׁה׃ 


Hagar, being afflicted for despising her mistress, runs away.
4   וַיָּבֹ֥א  אֶל־  הָגָ֖ר  וַתַּ֑הַר  וַתֵּ֙רֶא֙  כִּ֣י  הָרָ֔תָה  וַתֵּקַ֥ל  גְּבִרְתָּ֖הּ  בְּעֵינֶֽיהָ׃  5   וַתֹּ֨אמֶר  שָׂרַ֣י  אֶל־  אַבְרָם֮  חֲמָסִ֣י  עָלֶיךָ֒  אָנֹכִ֗י  נָתַ֤תִּי  שִׁפְחָתִי֙  בְּחֵיקֶ֔ךָ  וַתֵּ֙רֶא֙  כִּ֣י  הָרָ֔תָה  וָאֵקַ֖ל  בְּעֵינֶ֑יהָ  יִשְׁפֹּ֥ט  יְהוָ֖ה  בֵּינִ֥י  וּבֵינֶֽיךָ  6   וַיֹּ֨אמֶר  אַבְרָ֜ם  אֶל־  שָׂרַ֗י  הִנֵּ֤ה  שִׁפְחָתֵךְ֙  בְּיָדֵ֔ךְ  עֲשִׂי־  לָ֖הּ  הַטֹּ֣וב  בְּעֵינָ֑יִךְ  וַתְּעַנֶּ֣הָ  שָׂרַ֔י  וַתִּבְרַ֖ח  מִפָּנֶֽיהָ׃ 


An angel commands her to return and submit herself,
7   וַֽיִּמְצָאָ֞הּ  מַלְאַ֧ךְ  יְהוָ֛ה  עַל־  עֵ֥ין  הַמַּ֖יִם  בַּמִּדְבָּ֑ר  עַל־  הָעַ֖יִן  בְּדֶ֥רֶךְ  שֽׁוּר׃  8   וַיֹּאמַ֗ר  הָגָ֞ר  שִׁפְחַ֥ת  שָׂרַ֛י  אֵֽי־  מִזֶּ֥ה  בָ֖את  וְאָ֣נָה  תֵלֵ֑כִי  וַתֹּ֕אמֶר  מִפְּנֵי֙  שָׂרַ֣י  גְּבִרְתִּ֔י  אָנֹכִ֖י  בֹּרַֽחַת׃  9   וַיֹּ֤אמֶר  לָהּ֙  מַלְאַ֣ךְ  יְהוָ֔ה  שׁ֖וּבִי  אֶל־  גְּבִרְתֵּ֑ךְ  וְהִתְעַנִּ֖י  תַּ֥חַת  יָדֶֽיהָ׃ 


promises her a numerous posterity,
10   וַיֹּ֤אמֶר  לָהּ֙  מַלְאַ֣ךְ  יְהוָ֔ה  הַרְבָּ֥ה  אַרְבֶּ֖ה  אֶת־  זַרְעֵ֑ךְ  וְלֹ֥א  יִסָּפֵ֖ר  מֵרֹֽב׃  11   וַיֹּ֤אמֶר  לָהּ֙  מַלְאַ֣ךְ  יְהוָ֔ה  הִנָּ֥ךְ  הָרָ֖ה  וְיֹלַ֣דְתְּ  בֵּ֑ן  וְקָרָ֤את  שְׁמֹו֙  יִשְׁמָעֵ֔אל  כִּֽי־  שָׁמַ֥ע  יְהוָ֖ה  אֶל־  עָנְיֵֽךְ׃ 


and shows their character and condition.
12   וְה֤וּא  יִהְיֶה֙  פֶּ֣רֶא  אָדָ֔ם  יָדֹ֣ו  בַכֹּ֔ל  וְיַ֥ד  כֹּ֖ל  בֹּ֑ו  וְעַל־  פְּנֵ֥י  כָל־  אֶחָ֖יו  יִשְׁכֹּֽן׃ 


Hagar names the place, and returns to Sarai.
13   וַתִּקְרָ֤א  שֵׁם־  יְהוָה֙  הַדֹּבֵ֣ר  אֵלֶ֔יהָ  אַתָּ֖ה  אֵ֣ל  רֳאִ֑י  כִּ֣י  אָֽמְרָ֗ה  הֲגַ֥ם  הֲלֹ֛ם  רָאִ֖יתִי  אַחֲרֵ֥י  רֹאִֽי׃  14   עַל־  כֵּן֙  קָרָ֣א  לַבְּאֵ֔ר  בְּאֵ֥ר  לַחַ֖י  רֹאִ֑י  הִנֵּ֥ה  בֵין־  קָדֵ֖שׁ  וּבֵ֥ין  בָּֽרֶד׃ 


Ishmael is born.
15   וַתֵּ֧לֶד  הָגָ֛ר  לְאַבְרָ֖ם  בֵּ֑ן  וַיִּקְרָ֨א  אַבְרָ֧ם  שֶׁם־  בְּנֹ֛ו  אֲשֶׁר־  יָלְדָ֥ה  הָגָ֖ר  יִשְׁמָעֵֽאל׃ 


The age of Abram.
16   וְאַבְרָ֕ם  בֶּן־  שְׁמֹנִ֥ים  שָׁנָ֖ה  וְשֵׁ֣שׁ  שָׁנִ֑ים  בְּלֶֽדֶת־  הָגָ֥ר  אֶת־  יִשְׁמָעֵ֖אל  לְאַבְרָֽם׃  ס 

<< Genesis 16 >>
Biblos Greek and Hebrew Study Bible © 2010 Biblos.com
Online Parallel Bible