<< Galatians 3 GRK >>


He asks what moved them to leave the faith, and hold onto the law.
   1   Ὡ  ἀνόητοι  Γαλάται,  τίς  ὑμᾶς  ἐβάσκανεν,  οἷς  κατ’  ὀφθαλμοὺς  Ἰησοῦς  Χριστὸς  προεγράφη  ἐσταυρωμένος;  2   τοῦτο  μόνον  θέλω  μαθεῖν  ἀφ’  ὑμῶν·  ἐξ  ἔργων  νόμου  τὸ  πνεῦμα  ἐλάβετε  ἢ  ἐξ  ἀκοῆς  πίστεως;  3   οὕτως  ἀνόητοι  ἐστε,  ἐναρξάμενοι  πνεύματι  νῦν  σαρκὶ  ἐπιτελεῖσθε;  4   τοσαῦτα  ἐπάθετε  εἰκῇ;  εἴ  γε  καὶ  εἰκῇ.  5   ὁ  οὖν  ἐπιχορηγῶν  ὑμῖν  τὸ  πνεῦμα  καὶ  ἐνεργῶν  δυνάμεις  ἐν  ὑμῖν  ἐξ  ἔργων  νόμου  ἢ  ἐξ  ἀκοῆς  πίστεως; 


Those who believe are justified,
6   Καθὼς  Ἀβραὰμ  ἐπίστευσεν  τῷ  θεῷ,  καὶ  ἐλογίσθη  αὐτῷ  εἰς  δικαιοσύνην· 
   7   γινώσκετε  ἄρα  ὅτι  οἱ  ἐκ  πίστεως,  οὕτοι  υἱοί  εἰσιν  Ἀβραάμ.  8   προιδοῦσα  δὲ  ἡ  γραφὴ  ὅτι  ἐκ  πίστεως  δικαιοῖ  τὰ  ἔθνη  ὁ  θεὸς  προευηγγελίσατο  τῷ  Ἀβραὰμ  ὅτι  ἐνευλογηθήσονται  ἐν  σοὶ  πάντα  τὰ  ἔθνη· 


and blessed with Abraham.
9   ὥστε  οἱ  ἐκ  πίστεως  εὐλογοῦνται  σὺν  τῷ  πιστῷ  Ἀβραάμ. 


And this he shows by many reasons.
10   Ὅσοι  γὰρ  ἐξ  ἔργων  νόμου  εἰσίν,  ὑπὸ  κατάραν  εἰσίν·  γέγραπται  γὰρ  ὅτι  ἐπικατάρατος  πᾶς  ὃς  οὐκ  ἐμμένει  πᾶσιν  τοῖς  γεγραμμένοις  ἐν  τῷ  βιβλίῳ  τοῦ  νόμου  τοῦ  ποιῆσαι  αὐτά.  11   ὅτι  δὲ  ἐν  νόμῳ  οὐδεὶς  δικαιοῦται  παρὰ  τῷ  θεῷ  δῆλον,  ὅτι  ὁ  δίκαιος  ἐκ  πίστεως  ζήσεται·  12   ὁ  δὲ  νόμος  οὐκ  ἔστιν  ἐκ  πίστεως,  ἀλλ’  ὁ  ποιήσας  αὐτὰ  ζήσεται  ἐν  αὐτοῖς.  13   Χριστὸς  ἡμᾶς  ἐξηγόρασεν  ἐκ  τῆς  κατάρας  τοῦ  νόμου  γενόμενος  ὑπὲρ  ἡμῶν  κατάρα,  ὅτι  γέγραπται  ἐπικατάρατος  πᾶς  ὁ  κρεμάμενος  ἐπὶ  ξύλου,  14   ἵνα  εἰς  τὰ  ἔθνη  ἡ  εὐλογία  τοῦ  Ἀβραὰμ  γένηται  ἐν  Ἰησοῦ  Χριστῷ,  ἵνα  τὴν  ἐπαγγελίαν  τοῦ  πνεύματος  λάβωμεν  διὰ  τῆς  πίστεως. 


The purpose of the Law
   15   Ἀδελφοί,  κατὰ  ἄνθρωπον  λέγω·  ὅμως  ἀνθρώπου  κεκυρωμένην  διαθήκην  οὐδεὶς  ἀθετεῖ  ἢ  ἐπιδιατάσσεται.  16   τῷ  δὲ  Ἀβραὰμ  ἐρρέθησαν  αἱ  ἐπαγγελίαι  καὶ  τῷ  σπέρματι  αὐτοῦ.  οὐ  λέγει·  καὶ  τοῖς  σπέρμασιν,  ὡς  ἐπὶ  πολλῶν  ἀλλ’  ὡς  ἐφ’  ἑνός·  καὶ  τῷ  σπέρματι  σου,  ὅς  ἐστιν  Χριστός.  17   τοῦτο  δὲ  λέγω·  διαθήκην  προκεκυρωμένην  ὑπὸ  τοῦ  θεοῦ  ὁ  μετὰ  τετρακόσια  καὶ  τριάκοντα  ἔτη  γεγονὼς  νόμος  οὐκ  ἀκυροῖ  εἰς  τὸ  καταργῆσαι  τὴν  ἐπαγγελίαν.  18   εἰ  γὰρ  ἐκ  νόμου  ἡ  κληρονομία,  οὐκέτι  ἐξ  ἐπαγγελίας·  τῳ  δὲ  Ἀβραὰμ  δι’  ἐπαγγελίας  κεχάρισται  ὁ  θεός.  19   Τί  οὖν  ὁ  νόμος;  τῶν  παραβάσεων  χάριν  προσετέθη,  ἄχρις  ἂν  ἔλθῃ  τὸ  σπέρμα  ᾧ  ἐπήγγελται,  διαταγεὶς  δι’  ἄγγελων  ἐν  χειρὶ  μεσίτου.  20   ὁ  δὲ  μεσίτης  ἑνὸς  οὐκ  ἔστιν,  ὁ  δὲ  θεὸς  εἷς  ἐστιν. 
   21   ὁ  οὖν  νόμος  κατὰ  τῶν  ἐπαγγελιῶν  τοῦ  θεοῦ;  μὴ  γένοιτο,  εἰ  γὰρ  ἐδόθη  νόμος  ὁ  δυνάμενος  ζῳοποιῆσαι,  ὄντως  ἐν  νόμω  ἂν  ἦν  ἡ  δικαιοσύνη.  22   ἀλλὰ  συνέκλεισεν  ἡ  γραφὴ  τὰ  πάντα  ὑπὸ  ἁμαρτίαν,  ἵνα  ἡ  ἐπαγγελία  ἐκ  πίστεως  Ἰησοῦ  Χριστοῦ  δοθῇ  τοῖς  πιστεύουσιν. 
   23   Πρὸ  τοῦ  δὲ  ἐλθεῖν  τὴν  πίστιν  ὑπὸ  νόμον  ἐφρουρούμεθα  συγκλειόμενοι  εἰς  τὴν  μέλλουσαν  πίστιν  ἀποκαλυφθῆναι,  24   ὥστε  ὁ  νόμος  παιδαγωγὸς  ἡμῶν  γέγονεν  εἰς  Χριστὸν,  ἵνα  ἐκ  πίστεως  δικαιωθῶμεν,  25   ἐλθούσης  δὲ  τῆς  πίστεως  οὐκέτι  ὑπὸ  παιδαγωγόν  ἐσμεν. 


You are sons of God
   26   Πάντες  γὰρ  υἱοὶ  θεοῦ  ἐστε  διὰ  τῆς  πίστεως  ἐν  Χριστῷ  Ἰησοῦ·  27   ὅσοι  γὰρ  εἰς  Χριστὸν  ἐβαπτίσθητε,  Χριστὸν  ἐνεδύσασθε.  28   οὐκ  ἔνι  Ἰουδαῖος  οὐδὲ  Ἕλλην,  οὐκ  ἔνι  δοῦλος  οὐδὲ  ἐλεύθερος,  οὐκ  ἔνι  ἄρσεν  καὶ  θῆλυ·  πάντες  γὰρ  ὑμεῖς  εἷς  ἐστε  ἐν  Χριστῷ  Ἰησοῦ.  29   εἰ  δὲ  ὑμεῖς  Χριστοῦ,  ἄρα  τοῦ  Ἀβραὰμ  σπέρμα  ἐστέ,  κατ’  ἐπαγγελίαν  κληρονόμοι. 
<< Galatians 3 >>
Biblos Greek and Hebrew Study Bible © 2010 Biblos.com
Online Parallel Bible