<< 2 Kings 15 HEB >>


Azariah's good reign
1   בִּשְׁנַ֨ת  עֶשְׂרִ֤ים  וָשֶׁ֙בַע֙  שָׁנָ֔ה  לְיָרָבְעָ֖ם  מֶ֣לֶךְ  יִשְׂרָאֵ֑ל  מָלַ֛ךְ  עֲזַרְיָ֥ה  בֶן־  אֲמַצְיָ֖ה  מֶ֥לֶךְ  יְהוּדָֽה׃  2   בֶּן־  שֵׁ֨שׁ  עֶשְׂרֵ֤ה  שָׁנָה֙  הָיָ֣ה  בְמָלְכֹ֔ו  וַחֲמִשִּׁ֤ים  וּשְׁתַּ֙יִם֙  שָׁנָ֔ה  מָלַ֖ךְ  בִּירוּשָׁלִָ֑ם  וְשֵׁ֣ם  אִמֹּ֔ו  יְכָלְיָ֖הוּ  מִירוּשָׁלִָֽם׃  3   וַיַּ֥עַשׂ  הַיָּשָׁ֖ר  בְּעֵינֵ֣י  יְהוָ֑ה  כְּכֹ֥ל  אֲשֶׁר־  עָשָׂ֖ה  אֲמַצְיָ֥הוּ  אָבִֽיו׃  4   רַ֥ק  הַבָּמֹ֖ות  לֹא־  סָ֑רוּ  עֹ֥וד  הָעָ֛ם  מְזַבְּחִ֥ים  וּֽמְקַטְּרִ֖ים  בַּבָּמֹֽות׃ 


He dying a leper, is succeeded by Jotham
5   וַיְנַגַּ֨ע  יְהוָ֜ה  אֶת־  הַמֶּ֗לֶךְ  וַיְהִ֤י  מְצֹרָע֙  עַד־  יֹ֣ום  מֹתֹ֔ו  וַיֵּ֖שֶׁב  בְּבֵ֣ית  הַחָפְשִׁ֑ית  וְיֹותָ֤ם  בֶּן־  הַמֶּ֙לֶךְ֙  עַל־  הַבַּ֔יִת  שֹׁפֵ֖ט  אֶת־  עַ֥ם  הָאָֽרֶץ׃  6   וְיֶ֛תֶר  דִּבְרֵ֥י  עֲזַרְיָ֖הוּ  וְכָל־  אֲשֶׁ֣ר  עָשָׂ֑ה  הֲלֹא־  הֵ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יְהוּדָֽה׃  7   וַיִּשְׁכַּ֤ב  עֲזַרְיָה֙  עִם־  אֲבֹתָ֔יו  וַיִּקְבְּר֥וּ  אֹתֹ֛ו  עִם־  אֲבֹתָ֖יו  בְּעִ֣יר  דָּוִ֑ד  וַיִּמְלֹ֛ךְ  יֹותָ֥ם  בְּנֹ֖ו  תַּחְתָּֽיו׃  פ 


Zachariah the last of Jehu's generation, reigning ill, is slain by Shallum
8   בִּשְׁנַ֨ת  שְׁלֹשִׁ֤ים  וּשְׁמֹנֶה֙  שָׁנָ֔ה  לַעֲזַרְיָ֖הוּ  מֶ֣לֶךְ  יְהוּדָ֑ה  מָ֠לַךְ  זְכַרְיָ֨הוּ  בֶן־  יָרָבְעָ֧ם  עַל־  יִשְׂרָאֵ֛ל  בְּשֹׁמְרֹ֖ון  שִׁשָּׁ֥ה  חֳדָשִֽׁים׃  9   וַיַּ֤עַשׂ  הָרַע֙  בְּעֵינֵ֣י  יְהוָ֔ה  כַּאֲשֶׁ֥ר  עָשׂ֖וּ  אֲבֹתָ֑יו  לֹ֣א  סָ֗ר  מֵֽחַטֹּאות֙  יָרָבְעָ֣ם  בֶּן־  נְבָ֔ט  אֲשֶׁ֥ר  הֶחֱטִ֖יא  אֶת־  יִשְׂרָאֵֽל׃  10   וַיִּקְשֹׁ֤ר  עָלָיו֙  שַׁלֻּ֣ם  בֶּן־  יָבֵ֔שׁ  וַיַּכֵּ֥הוּ  קָֽבָלְעָ֖ם     וַיְמִיתֵ֑הוּ  וַיִּמְלֹ֖ךְ  תַּחְתָּֽיו׃  11   וְיֶ֖תֶר  דִּבְרֵ֣י  זְכַרְיָ֑ה  הִנָּ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יִשְׂרָאֵֽל׃  12   ה֣וּא  דְבַר־  יְהוָ֗ה  אֲשֶׁ֨ר  דִּבֶּ֤ר  אֶל־  יֵהוּא֙  לֵאמֹ֔ר  בְּנֵ֣י  רְבִיעִ֔ים  יֵשְׁב֥וּ  לְךָ֖  עַל־  כִּסֵּ֣א  יִשְׂרָאֵ֑ל  וַֽיְהִי־  כֵֽן׃  פ 


Shallum, reigning a month, is slain by Nenahem
13   שַׁלּ֤וּם  בֶּן־  יָבֵישׁ֙  מָלַ֔ךְ  בִּשְׁנַ֨ת  שְׁלֹשִׁ֤ים  וָתֵ֙שַׁע֙  שָׁנָ֔ה  לְעֻזִיָּ֖ה  מֶ֣לֶךְ  יְהוּדָ֑ה  וַיִּמְלֹ֥ךְ  יֶֽרַח־  יָמִ֖ים  בְּשֹׁמְרֹֽון׃  14   וַיַּעַל֩  מְנַחֵ֨ם  בֶּן־  גָּדִ֜י  מִתִּרְצָ֗ה  וַיָּבֹא֙  שֹׁמְרֹ֔ון  וַיַּ֛ךְ  אֶת־  שַׁלּ֥וּם  בֶּן־  יָבֵ֖ישׁ  בְּשֹׁמְרֹ֑ון  וַיְמִיתֵ֖הוּ  וַיִּמְלֹ֥ךְ  תַּחְתָּֽיו׃  15   וְיֶ֙תֶר֙  דִּבְרֵ֣י  שַׁלּ֔וּם  וְקִשְׁרֹ֖ו  אֲשֶׁ֣ר  קָשָׁ֑ר  הִנָּ֣ם  כְּתֻבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יִשְׂרָאֵֽל׃  ס 


Menahem strengthens himself by Pul
16   אָ֣ז  יַכֶּֽה־  מְ֠נַחֵם  אֶת־  תִּפְסַ֨ח  וְאֶת־  כָּל־  אֲשֶׁר־  בָּ֤הּ  וְאֶת־  גְּבוּלֶ֙יהָ֙  מִתִּרְצָ֔ה  כִּ֛י  לֹ֥א  פָתַ֖ח  וַיַּ֑ךְ  אֵ֛ת  כָּל־  הֶהָ֥רֹותֶ֖יהָ  בִּקֵּֽעַ׃  פ  17   בִּשְׁנַ֨ת  שְׁלֹשִׁ֤ים  וָתֵ֙שַׁע֙  שָׁנָ֔ה  לַעֲזַרְיָ֖ה  מֶ֣לֶךְ  יְהוּדָ֑ה  מָ֠לַךְ  מְנַחֵ֨ם  בֶּן־  גָּדִ֧י  עַל־  יִשְׂרָאֵ֛ל  עֶ֥שֶׂר  שָׁנִ֖ים  בְּשֹׁמְרֹֽון׃  18   וַיַּ֥עַשׂ  הָרַ֖ע  בְּעֵינֵ֣י  יְהוָ֑ה  לֹ֣א  סָ֠ר  מֵעַ֨ל  חַטֹּ֜אות  יָרָבְעָ֧ם  בֶּן־  נְבָ֛ט  אֲשֶׁר־  הֶחֱטִ֥יא  אֶת־  יִשְׂרָאֵ֖ל  כָּל־  יָמָֽיו׃  19   בָּ֣א  פ֤וּל  מֶֽלֶךְ־  אַשּׁוּר֙  עַל־  הָאָ֔רֶץ  וַיִּתֵּ֤ן  מְנַחֵם֙  לְפ֔וּל  אֶ֖לֶף  כִּכַּר־  כָּ֑סֶף  לִהְיֹ֤ות  יָדָיו֙  אִתֹּ֔ו  לְהַחֲזִ֥יק  הַמַּמְלָכָ֖ה  בְּיָדֹֽו׃  20   וַיֹּצֵא֩  מְנַחֵ֨ם  אֶת־  הַכֶּ֜סֶף  עַל־  יִשְׂרָאֵ֗ל  עַ֚ל  כָּל־  גִּבֹּורֵ֣י  הַחַ֔יִל  לָתֵת֙  לְמֶ֣לֶךְ  אַשּׁ֔וּר  חֲמִשִּׁ֧ים  שְׁקָלִ֛ים  כֶּ֖סֶף  לְאִ֣ישׁ  אֶחָ֑ד  וַיָּ֙שָׁב֙  מֶ֣לֶךְ  אַשּׁ֔וּר  וְלֹא־  עָ֥מַד  שָׁ֖ם  בָּאָֽרֶץ׃ 


Pekahiah succeeds him
21   וְיֶ֛תֶר  דִּבְרֵ֥י  מְנַחֵ֖ם  וְכָל־  אֲשֶׁ֣ר  עָשָׂ֑ה  הֲלֹוא־  הֵ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יִשְׂרָאֵֽל׃  22   וַיִּשְׁכַּ֥ב  מְנַחֵ֖ם  עִם־  אֲבֹתָ֑יו  וַיִּמְלֹ֛ךְ  פְּקַחְיָ֥ה  בְנֹ֖ו  תַּחְתָּֽיו׃  פ 


Pekahiah is slain by Pekah
23   בִּשְׁנַת֙  חֲמִשִּׁ֣ים  שָׁנָ֔ה  לַעֲזַרְיָ֖ה  מֶ֣לֶךְ  יְהוּדָ֑ה  מָ֠לַךְ  פְּקַֽחְיָ֨ה  בֶן־  מְנַחֵ֧ם  עַל־  יִשְׂרָאֵ֛ל  בְּשֹׁמְרֹ֖ון  שְׁנָתָֽיִם׃  24   וַיַּ֥עַשׂ  הָרַ֖ע  בְּעֵינֵ֣י  יְהוָ֑ה  לֹ֣א  סָ֗ר  מֵֽחַטֹּאות֙  יָרָבְעָ֣ם  בֶּן־  נְבָ֔ט  אֲשֶׁ֥ר  הֶחֱטִ֖יא  אֶת־  יִשְׂרָאֵֽל׃  25   וַיִּקְשֹׁ֣ר  עָלָיו֩  פֶּ֨קַח  בֶּן־  רְמַלְיָ֜הוּ  שָׁלִישֹׁ֗ו  וַיַּכֵּ֨הוּ  בְשֹׁמְרֹ֜ון  בְּאַרְמֹ֤ון  בֵּית־  [מֶלֶךְ  כ]  (הַמֶּ֙לֶךְ֙  ק)  אֶת־  אַרְגֹּ֣ב  וְאֶת־  הָאַרְיֵ֔ה  וְעִמֹּ֛ו  חֲמִשִּׁ֥ים  אִ֖ישׁ  מִבְּנֵ֣י  גִלְעָדִ֑ים  וַיְמִיתֵ֖הוּ  וַיִּמְלֹ֥ךְ  תַּחְתָּֽיו׃  26   וְיֶ֛תֶר  דִּבְרֵ֥י  פְקַחְיָ֖ה  וְכָל־  אֲשֶׁ֣ר  עָשָׂ֑ה  הִנָּ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יִשְׂרָאֵֽל׃  פ 


Pekah is oppressed by Tiglath-pileser, and slain by Hoshea
27   בִּשְׁנַ֨ת  חֲמִשִּׁ֤ים  וּשְׁתַּ֙יִם֙  שָׁנָ֔ה  לַעֲזַרְיָ֖ה  מֶ֣לֶךְ  יְהוּדָ֑ה  מָ֠לַךְ  פֶּ֣קַח  בֶּן־  רְמַלְיָ֧הוּ  עַל־  יִשְׂרָאֵ֛ל  בְּשֹׁמְרֹ֖ון  עֶשְׂרִ֥ים  שָׁנָֽה׃  28   וַיַּ֥עַשׂ  הָרַ֖ע  בְּעֵינֵ֣י  יְהוָ֑ה  לֹ֣א  סָ֗ר  מִן־  חַטֹּאות֙  יָרָבְעָ֣ם  בֶּן־  נְבָ֔ט  אֲשֶׁ֥ר  הֶחֱטִ֖יא  אֶת־  יִשְׂרָאֵֽל׃  29   בִּימֵ֞י  פֶּ֣קַח  מֶֽלֶךְ־  יִשְׂרָאֵ֗ל  בָּא֮  תִּגְלַ֣ת  פִּלְאֶסֶר֮  מֶ֣לֶךְ  אַשּׁוּר֒  וַיִּקַּ֣ח  אֶת־  עִיֹּ֡ון  וְאֶת־  אָבֵ֣ל  בֵּֽית־  מַעֲכָ֡ה  וְאֶת־  יָ֠נֹוחַ  וְאֶת־  קֶ֨דֶשׁ  וְאֶת־  חָצֹ֤ור  וְאֶת־  הַגִּלְעָד֙  וְאֶת־  הַגָּלִ֔ילָה  כֹּ֖ל  אֶ֣רֶץ  נַפְתָּלִ֑י  וַיַּגְלֵ֖ם  אַשּֽׁוּרָה׃  30   וַיִּקְשָׁר־  קֶ֜שֶׁר  הֹושֵׁ֣עַ  בֶּן־  אֵלָ֗ה  עַל־  פֶּ֙קַח֙  בֶּן־  רְמַלְיָ֔הוּ  וַיַּכֵּ֙הוּ֙  וַיְמִיתֵ֔הוּ  וַיִּמְלֹ֖ךְ  תַּחְתָּ֑יו  בִּשְׁנַ֣ת  עֶשְׂרִ֔ים  לְיֹותָ֖ם  בֶּן־  עֻזִיָּֽה׃  31   וְיֶ֥תֶר  דִּבְרֵי־  פֶ֖קַח  וְכָל־  אֲשֶׁ֣ר  עָשָׂ֑ה  הִנָּ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יִשְׂרָאֵֽל׃  פ 


Jotham's good reign
32   בִּשְׁנַ֣ת  שְׁתַּ֔יִם  לְפֶ֥קַח  בֶּן־  רְמַלְיָ֖הוּ  מֶ֣לֶךְ  יִשְׂרָאֵ֑ל  מָלַ֛ךְ  יֹותָ֥ם  בֶּן־  עֻזִיָּ֖הוּ  מֶ֥לֶךְ  יְהוּדָֽה׃  33   בֶּן־  עֶשְׂרִ֨ים  וְחָמֵ֤שׁ  שָׁנָה֙  הָיָ֣ה  בְמָלְכֹ֔ו  וְשֵׁשׁ־  עֶשְׂרֵ֣ה  שָׁנָ֔ה  מָלַ֖ךְ  בִּירוּשָׁלִָ֑ם  וְשֵׁ֣ם  אִמֹּ֔ו  יְרוּשָׁ֖א  בַּת־  צָדֹֽוק׃  34   וַיַּ֥עַשׂ  הַיָּשָׁ֖ר  בְּעֵינֵ֣י  יְהוָ֑ה  כְּכֹ֧ל  אֲשֶׁר־  עָשָׂ֛ה  עֻזִיָּ֥הוּ  אָבִ֖יו  עָשָֽׂה׃  35   רַ֤ק  הַבָּמֹות֙  לֹ֣א  סָ֔רוּ  עֹ֗וד  הָעָ֛ם  מְזַבְּחִ֥ים  וּֽמְקַטְּרִ֖ים  בַּבָּמֹ֑ות  ה֗וּא  בָּנָ֛ה  אֶת־  שַׁ֥עַר  בֵּית־  יְהוָ֖ה  הָעֶלְיֹֽון׃ 


Ahaz succeeds him
36   וְיֶ֛תֶר  דִּבְרֵ֥י  יֹותָ֖ם  אֲשֶׁ֣ר  עָשָׂ֑ה  הֲלֹא־  הֵ֣ם  כְּתוּבִ֗ים  עַל־  סֵ֛פֶר  דִּבְרֵ֥י  הַיָּמִ֖ים  לְמַלְכֵ֥י  יְהוּדָֽה׃  37   בַּיָּמִ֣ים  הָהֵ֔ם  הֵחֵ֣ל  יְהוָ֗ה  לְהַשְׁלִ֙יחַ֙  בִּֽיהוּדָ֔ה  רְצִ֖ין  מֶ֣לֶךְ  אֲרָ֑ם  וְאֵ֖ת  פֶּ֥קַח  בֶּן־  רְמַלְיָֽהוּ׃  38   וַיִּשְׁכַּ֤ב  יֹותָם֙  עִם־  אֲבֹתָ֔יו  וַיִּקָּבֵר֙  עִם־  אֲבֹתָ֔יו  בְּעִ֖יר  דָּוִ֣ד  אָבִ֑יו  וַיִּמְלֹ֛ךְ  אָחָ֥ז  בְּנֹ֖ו  תַּחְתָּֽיו׃  פ 
<< 2 Kings 15 >>
Biblos Greek and Hebrew Study Bible © 2010 Biblos.com
Online Parallel Bible