<< 2 Chronicles 21 HEB >>


Jehoram, succeeding Jehoshaphat, slays his brothers
1   וַיִּשְׁכַּ֤ב  יְהֹֽושָׁפָט֙  עִם־  אֲבֹתָ֔יו  וַיִּקָּבֵ֥ר  עִם־  אֲבֹתָ֖יו  בְּעִ֣יר  דָּוִ֑יד  וַיִּמְלֹ֛ךְ  יְהֹורָ֥ם  בְּנֹ֖ו  תַּחְתָּֽיו׃  2   וְלֹֽו־  אַחִ֞ים  בְּנֵ֣י  יְהֹושָׁפָ֗ט  עֲזַרְיָ֤ה  וִֽיחִיאֵל֙  וּזְכַרְיָ֣הוּ  וַעֲזַרְיָ֔הוּ  וּמִיכָאֵ֖ל  וּשְׁפַטְיָ֑הוּ  כָּל־  אֵ֕לֶּה  בְּנֵ֥י  יְהֹושָׁפָ֖ט  מֶ֥לֶךְ־  יִשְׂרָאֵֽל׃  3   וַיִּתֵּ֣ן  לָהֶ֣ם  אֲ֠בִיהֶם  מַתָּנֹ֨ות  רַבֹּ֜ות  לְכֶ֤סֶף  וּלְזָהָב֙  וּלְמִגְדָּנֹ֔ות  עִם־  עָרֵ֥י  מְצֻרֹ֖ות  בִּֽיהוּדָ֑ה  וְאֶת־  הַמַּמְלָכָ֛ה  נָתַ֥ן  לִֽיהֹורָ֖ם  כִּי־  ה֥וּא  הַבְּכֹֽור׃  פ  4   וַיָּ֨קָם  יְהֹורָ֜ם  עַל־  מַמְלֶ֤כַת  אָבִיו֙  וַיִּתְחַזַּ֔ק  וַיַּהֲרֹ֥ג  אֶת־  כָּל־  אֶחָ֖יו  בֶּחָ֑רֶב  וְגַ֖ם  מִשָּׂרֵ֥י  יִשְׂרָאֵֽל׃ 


His wicked reign
5   בֶּן־  שְׁלֹשִׁ֥ים  וּשְׁתַּ֛יִם  שָׁנָ֖ה  יְהֹורָ֣ם  בְּמָלְכֹ֑ו  וּשְׁמֹונֶ֣ה  שָׁנִ֔ים  מָלַ֖ךְ  בִּירוּשָׁלִָֽם׃  6   וַיֵּ֜לֶךְ  בְּדֶ֣רֶךְ  מַלְכֵ֣י  יִשְׂרָאֵ֗ל  כַּאֲשֶׁ֤ר  עָשׂוּ֙  בֵּ֣ית  אַחְאָ֔ב  כִּ֚י  בַּת־  אַחְאָ֔ב  הָ֥יְתָה  לֹּ֖ו  אִשָּׁ֑ה  וַיַּ֥עַשׂ  הָרַ֖ע  בְּעֵינֵ֥י  יְהוָֽה׃  7   וְלֹא־  אָבָ֣ה  יְהוָ֗ה  לְהַשְׁחִית֙  אֶת־  בֵּ֣ית  דָּוִ֔יד  לְמַ֣עַן  הַבְּרִ֔ית  אֲשֶׁ֥ר  כָּרַ֖ת  לְדָוִ֑יד  וְכַאֲשֶׁ֣ר  אָמַ֗ר  לָתֵ֨ת  לֹ֥ו  נִ֛יר  וּלְבָנָ֖יו  כָּל־  הַיָּמִֽים׃ 


Edom and Libnah revolt
8   בְּיָמָיו֙  פָּשַׁ֣ע  אֱדֹ֔ום  מִתַּ֖חַת  יַד־  יְהוּדָ֑ה  וַיַּמְלִ֥יכוּ  עֲלֵיהֶ֖ם  מֶֽלֶךְ׃  9   וַיַּֽעֲבֹ֤ר  יְהֹורָם֙  עִם־  שָׂרָ֔יו  וְכָל־  הָרֶ֖כֶב  עִמֹּ֑ו  וַיְהִי֙  קָ֣ם  לַ֔יְלָה  וַיַּ֗ךְ  אֶת־  אֱדֹום֙  הַסֹּובֵ֣ב  אֵלָ֔יו  וְאֵ֖ת  שָׂרֵ֥י  הָרָֽכֶב׃  10   וַיִּפְשַׁ֨ע  אֱדֹ֜ום  מִתַּ֣חַת  יַד־  יְהוּדָ֗ה  עַ֚ד  הַיֹּ֣ום  הַזֶּ֔ה  אָ֣ז  תִּפְשַׁ֥ע  לִבְנָ֛ה  בָּעֵ֥ת  הַהִ֖יא  מִתַּ֣חַת  יָדֹ֑ו  כִּ֣י  עָזַ֔ב  אֶת־  יְהוָ֖ה  אֱלֹהֵ֥י  אֲבֹתָֽיו׃  11   גַּם־  ה֥וּא  עָשָֽׂה־  בָמֹ֖ות  בְּהָרֵ֣י  יְהוּדָ֑ה  וַיֶּ֙זֶן֙  אֶת־  יֹשְׁבֵ֣י  יְרוּשָׁלִַ֔ם  וַיַּדַּ֖ח  אֶת־  יְהוּדָֽה׃  פ 


The prophecy of Elijah against him in writing
12   וַיָּבֹ֤א  אֵלָיו֙  מִכְתָּ֔ב  מֵֽאֵלִיָּ֥הוּ  הַנָּבִ֖יא  לֵאמֹ֑ר  כֹּ֣ה  אָמַ֣ר  יְהוָ֗ה  אֱלֹהֵי֙  דָּוִ֣יד  אָבִ֔יךָ  תַּ֗חַת  אֲשֶׁ֤ר  לֹֽא־  הָלַ֙כְתָּ֙  בְּדַרְכֵי֙  יְהֹושָׁפָ֣ט  אָבִ֔יךָ  וּבְדַרְכֵ֖י  אָסָ֥א  מֶֽלֶךְ־  יְהוּדָֽה׃  13   וַתֵּ֗לֶךְ  בְּדֶ֙רֶךְ֙  מַלְכֵ֣י  יִשְׂרָאֵ֔ל  וַתַּזְנֶ֤ה  אֶת־  יְהוּדָה֙  וְאֶת־  יֹשְׁבֵ֣י  יְרוּשָׁלִַ֔ם  כְּהַזְנֹ֖ות  בֵּ֣ית  אַחְאָ֑ב  וְגַ֨ם  אֶת־  אַחֶ֧יךָ  בֵית־  אָבִ֛יךָ  הַטֹּובִ֥ים  מִמְּךָ֖  הָרָֽגְתָּ׃  14   הִנֵּ֣ה  יְהוָ֗ה  נֹגֵ֛ף  מַגֵּפָ֥ה  גְדֹולָ֖ה  בְּעַמֶּ֑ךָ  וּבְבָנֶ֥יךָ  וּבְנָשֶׁ֖יךָ  וּבְכָל־  רְכוּשֶֽׁךָ׃  15   וְאַתָּ֛ה  בָּחֳלָיִ֥ים  רַבִּ֖ים  בְּמַחֲלֵ֣ה  מֵעֶ֑יךָ  עַד־  יֵצְא֤וּ  מֵעֶ֙יךָ֙  מִן־  הַחֹ֔לִי  יָמִ֖ים  עַל־  יָמִֽים׃ 


Philistines and Arabians oppress him
16   וַיָּ֨עַר  יְהוָ֜ה  עַל־  יְהֹורָ֗ם  אֵ֣ת  ר֤וּחַ  הַפְּלִשְׁתִּים֙  וְהָ֣עַרְבִ֔ים  אֲשֶׁ֖ר  עַל־  יַ֥ד  כּוּשִֽׁים׃  17   וַיַּעֲל֤וּ  בִֽיהוּדָה֙  וַיִּבְקָע֔וּהָ  וַיִּשְׁבּ֗וּ  אֵ֤ת  כָּל־  הָרְכוּשׁ֙  הַנִּמְצָ֣א  לְבֵית־  הַמֶּ֔לֶךְ  וְגַם־  בָּנָ֖יו  וְנָשָׁ֑יו  וְלֹ֤א  נִשְׁאַר־  לֹו֙  בֵּ֔ן  כִּ֥י  אִם־  יְהֹואָחָ֖ז  קְטֹ֥ן  בָּנָֽיו׃ 


His incurable disease, infamous death, and burial
18   וְאַחֲרֵ֖י  כָּל־  זֹ֑את  נְגָפֹ֨ו  יְהוָ֧ה  בְּמֵעָ֛יו  לָחֳלִ֖י  לְאֵ֥ין  מַרְפֵּֽא׃  19   וַיְהִ֣י  לְיָמִ֣ים  מִיָּמִ֡ים  וּכְעֵת֩  צֵ֨את  הַקֵּ֜ץ  לְיָמִ֣ים  שְׁנַ֗יִם  יָצְא֤וּ  מֵעָיו֙  עִם־  חָלְיֹ֔ו  וַיָּ֖מָת  בְּתַחֲלֻאִ֣ים  רָעִ֑ים  וְלֹא־  עָ֨שׂוּ  לֹ֥ו  עַמֹּ֛ו  שְׂרֵפָ֖ה  כִּשְׂרֵפַ֥ת  אֲבֹתָֽיו׃  20   בֶּן־  שְׁלֹשִׁ֤ים  וּשְׁתַּ֙יִם֙  הָיָ֣ה  בְמָלְכֹ֔ו  וּשְׁמֹונֶ֣ה  שָׁנִ֔ים  מָלַ֖ךְ  בִּירוּשָׁלִָ֑ם  וַיֵּ֙לֶךְ֙  בְּלֹ֣א  חֶמְדָּ֔ה  וַֽיִּקְבְּרֻ֙הוּ֙  בְּעִ֣יר  דָּוִ֔יד  וְלֹ֖א  בְּקִבְרֹ֥ות  הַמְּלָכִֽים׃ 
<< 2 Chronicles 21 >>
Biblos Greek and Hebrew Study Bible © 2010 Biblos.com
Online Parallel Bible