<< 1 Thessalonians 4 GRK >>


He exhorts them to go forward in all manner of godliness;
   1   Λοιπὸν,  ἀδελφοί,  ἐρωτῶμεν  ὑμᾶς  καὶ  παρακαλοῦμεν  ἐν  κυρίῳ  Ἰησοῦ,  ἵνα  καθὼς  παρελάβετε  παρ’  ἡμῶν  τὸ  πῶς  δεῖ  ὑμᾶς  περιπατεῖν  καὶ  ἀρέσκειν  θεῷ,  καθὼς  καὶ  περιπατεῖτε,  ἵνα  περισσεύητε  μᾶλλον.  2   οἴδατε  γὰρ  τίνας  παραγγελίας  ἐδώκαμεν  ὑμῖν  διὰ  τοῦ  κυρίου  Ἰησοῦ.  3   τοῦτο  γάρ  ἐστιν  θέλημα  τοῦ  θεοῦ,  ὁ  ἁγιασμὸς  ὑμῶν,  ἀπέχεσθαι  ὑμᾶς  ἀπὸ  τῆς  πορνείας,  4   εἰδέναι  ἕκαστον  ὑμῶν  τὸ  ἑαυτοῦ  σκεῦος  κτᾶσθαι  ἐν  ἁγιασμῷ  καὶ  τιμῇ,  5   μὴ  ἐν  πάθει  ἐπιθυμίας  καθάπερ  καὶ  τὰ  ἔθνη  τὰ  μὴ  εἰδότα  τὸν  θεόν, 


to live holily and justly;
6   τὸ  μὴ  ὑπερβαίνειν  καὶ  πλεονεκτεῖν  ἐν  τῷ  πράγματι  τὸν  ἀδελφὸν  αὐτοῦ,  διότι  ἔκδικος  κύριος  περὶ  πάντων  τούτων  καθὼς  καὶ  προείπαμεν  ὑμῖν  καὶ  διεμαρτυράμεθα.  7   οὐ  γὰρ  ἐκάλεσεν  ἡμᾶς  ὁ  θεὸς  ἐπὶ  ἀκαθαρσίᾳ  ἀλλ’  ἐν  ἁγιασμῷ.  8   τοιγαροῦν  ὁ  ἀθετῶν  οὐκ  ἄνθρωπον  ἀθετεῖ  ἀλλὰ  τὸν  θεὸν  τὸν  διδόντα  τὸ  πνεῦμα  αὐτοῦ  τὸ  ἅγιον  εἰς  ὑμᾶς. 


to love one another;
   9   Περὶ  δὲ  τῆς  φιλαδελφίας  οὐ  χρείαν  ἔχετε  γράφειν  ὑμῖν,  αὐτοὶ  γὰρ  ὑμεῖς  θεοδίδακτοι  ἐστε  εἰς  τὸ  ἀγαπᾶν  ἀλλήλους,  10   καὶ  γὰρ  ποιεῖτε  αὐτὸ  εἰς  πάντας  τοὺς  ἀδελφοὺς  τοὺς  ἐν  ὅλῃ  τῇ  Μακεδονίᾳ.  παρακαλοῦμεν  δὲ  ὑμᾶς,  ἀδελφοί,  περισσεύειν  μᾶλλον 


and quietly to follow their own business;
11   καὶ  φιλοτιμεῖσθαι  ἡσυχάζειν  καὶ  πράσσειν  τὰ  ἴδια  καὶ  ἐργάζεσθαι  ταῖς  χερσὶν  ὑμῶν  καθὼς  ὑμῖν  παρηγγείλαμεν,  12   ἵνα  περιπατῆτε  εὐσχημόνως  πρὸς  τοὺς  ἔξω  καὶ  μηδενὸς  χρείαν  ἔχητε. 


and last of all, to sorrow moderately for the dead.
   13   Οὐ  θέλομεν  δὲ  ὑμᾶς  ἀγνοεῖν,  ἀδελφοί,  περὶ  τῶν  κοιμωμένων,  ἵνα  μὴ  λυπῆσθε  καθὼς  καὶ  οἱ  λοιποὶ  οἱ  μὴ  ἔχοντες  ἐλπίδα.  14   εἰ  γὰρ  πιστεύομεν  ὅτι  Ἰησοῦς  ἀπέθανεν  καὶ  ἀνέστη,  οὕτως  καὶ  ὁ  θεὸς  τοὺς  κοιμηθέντας  διὰ  τοῦ  Ἰησοῦ  ἄξει  σὺν  αὐτῷ. 
   15   Τοῦτο  γὰρ  ὑμῖν  λέγομεν  ἐν  λόγῳ  κυρίου,  ὅτι  ἡμεῖς  οἱ  ζῶντες  οἱ  περιλειπόμενοι  εἰς  τὴν  παρουσίαν  τοῦ  κυρίου  οὐ  μὴ  φθάσωμεν  τοὺς  κοιμηθέντας·  16   ὅτι  αὐτὸς  ὁ  κύριος  ἐν  κελεύσματι,  ἐν  φωνῇ  ἀρχαγγέλου  καὶ  ἐν  σάλπιγγι  θεοῦ  καταβήσεται  ἀπ’  οὐρανοῦ  καὶ  οἱ  νεκροὶ  ἐν  Χριστῷ  ἀναστήσονται  πρῶτον, 


followed by a brief description of the resurrection, and second coming of Christ to judgment.
17   ἔπειτα  ἡμεῖς  οἱ  ζῶντες  οἱ  περιλειπόμενοι  ἅμα  σὺν  αὐτοῖς  ἁρπαγησόμεθα  ἐν  νεφέλαις  εἰς  ἀπάντησιν  τοῦ  κυρίου  εἰς  ἀέρα·  καὶ  οὕτως  πάντοτε  σὺν  κυρίῷ  ἐσόμεθα.  18   Ὥστε  παρακαλεῖτε  ἀλλήλους  ἐν  τοῖς  λόγοις  τούτοις. 
<< 1 Thessalonians 4 >>
Biblos Greek and Hebrew Study Bible © 2010 Biblos.com
Online Parallel Bible