Psalm 97 Aleppo Codex 1א יהוה מלך תגל הארץ ישמחו איים רבים 2ב ענן וערפל סביביו צדק ומשפט מכון כסאו 3ג אש לפניו תלך ותלהט סביב צריו 4ד האירו ברקיו תבל ראתה ותחל הארץ 5ה הרים--כדונג נמסו מלפני יהוה מלפני אדון כל-הארץ 6ו הגידו השמים צדקו וראו כל-העמים כבודו 7ז יבשו כל-עבדי פסל-- המתהללים באלילים השתחוו-לו כל-אלהים 8ח שמעה ותשמח ציון ותגלנה בנות יהודה-- למען משפטיך יהוה 9ט כי-אתה יהוה עליון על-כל-הארץ מאד נעלית על-כל-אלהים 10י אהבי יהוה שנאו-רע שמר נפשות חסידיו מיד רשעים יצילם 11יא אור זרע לצדיק ולישרי-לב שמחה 12יב שמחו צדיקים ביהוה והודו לזכר קדשו The Aleppo Codex without Vowel Points or Punctuation Based on the electronic edition at mechon-mamre.org. For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. |
    |