Mashali 11
Proverbs 11 Aleppo Codex
1א מאזני מרמה תועבת יהוה  ואבן שלמה רצונו

2ב בא-זדון ויבא קלון  ואת-צנועים חכמה

3ג תמת ישרים תנחם  וסלף בגדים ושדם (ישדם)

4ד לא-יועיל הון ביום עברה  וצדקה תציל ממות

5ה צדקת תמים תישר דרכו  וברשעתו יפל רשע

6ו צדקת ישרים תצילם  ובהות בגדים ילכדו

7ז במות אדם רשע תאבד תקוה  ותוחלת אונים אבדה

8ח צדיק מצרה נחלץ  ויבא רשע תחתיו

9ט בפה--חנף ישחת רעהו  ובדעת צדיקים יחלצו

10י בטוב צדיקים תעלץ קריה  ובאבד רשעים רנה

11יא בברכת ישרים תרום קרת  ובפי רשעים תהרס

12יב בז-לרעהו חסר-לב  ואיש תבונות יחריש

13יג הולך רכיל מגלה-סוד  ונאמן-רוח מכסה דבר

14יד באין תחבלות יפל-עם  ותשועה ברב יועץ

15טו רע-ירוע כי-ערב זר  ושנא תקעים בוטח

16טז אשת-חן תתמך כבוד  ועריצים יתמכו-עשר

17יז גמל נפשו איש חסד  ועכר שארו אכזרי

18יח רשע--עשה פעלת-שקר  וזרע צדקה שכר אמת

19יט כן-צדקה לחיים  ומרדף רעה למותו

20כ תועבת יהוה עקשי-לב  ורצונו תמימי דרך

21כא יד ליד לא-ינקה רע  וזרע צדיקים נמלט

22כב נזם זהב באף חזיר--  אשה יפה וסרת טעם

23כג תאות צדיקים אך-טוב  תקות רשעים עברה

24כד יש מפזר ונוסף עוד  וחשך מישר אך-למחסור

25כה נפש-ברכה תדשן  ומרוה גם-הוא יורא

26כו מנע בר יקבהו לאום  וברכה לראש משביר

27כז שחר טוב יבקש רצון  ודרש רעה תבואנו

28כח בוטח בעשרו הוא יפול  וכעלה צדיקים יפרחו

29כט עכר ביתו ינחל-רוח  ועבד אויל לחכם-לב

30ל פרי-צדיק עץ חיים  ולקח נפשות חכם

31לא הן צדיק בארץ ישלם  אף כי-רשע וחוטא

The Aleppo Codex without Vowel Points or Punctuation Based on the electronic edition at mechon-mamre.org.

For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others.

Bible Hub

Proverbs 10
Top of Page
Top of Page